នៅចាំបានទេ ករណីហិង្សា ដោយគ្រាន់តែសត្វសារិកា២ក្បាលងាប់ នៅខេត្តឧត្តរមានជ័យ តើជនបង្កទៅដល់ណាហើយ ចំណែកអ្នកពាក់ព័ន្ធមាននរណាខ្លះ?

ខេត្តឧត្តរមានជ័យ ៖ ប្រហែលជាបងប្អូនមិនទាន់ភ្លេចទេ រឿងរ៉ាវ ដែលក្មេងស្រី ជាអនីតិជន២នាក់បងប្អូនបង្កើត ត្រូវបានគេធ្វើទារុណកម្មយ៉ាងសាហាវ ដោយយករំពាត់ វាយបែកឈាម ពេញខ្នង គ្រាន់តែធ្វេសប្រហែស ធ្វើអោយសត្វសារិកាកែវ២ក្បាលងាប់ រហូតមកដល់ពេលនេះ ក្មេងស្រីរងគ្រោះ មិនទាន់ទទួលបានយុត្តធម៌នៅឡើយទេ ខណៈដែលជនបង្ក កំពុងមានសេរីភាព ដោយរត់គេចខ្លួនទៅកាន់ប្រទេសថៃ ហើយមហាជនកំពុងតែចង់ដឹងថា តើអ្នកណា មានសិទ្ធអំណាចអាចរំដោះ ជនបង្កទារុណកម្មលើក្មេងស្រីជា អនីតិជន អោយរត់គេចខ្លួន ហើយខណៈពេលនេះ ជនសង្ស័យដែលជាជនបង្ក ក៏កំពុងមានសេរីភាព ដើរហើរពេញភូមិ ក៏ព្រោះតែស្រ្តីជាម្តាយ របស់ជនបង្ក បានដើរអួតប្រាប់គេឯងពេញភូមិថា “សម័យនេះ មានលុយគឺអាចធ្វើអ្វីៗបានទាំងអស់ ហើយគ្មានអ្នកណាហ៊ានធ្វើអីលើកគេដែរ ក៏ព្រោះតែរូបគាត់បានចំណាយ លុយមួយចំនួននៅក្នុងមូលដ្ឋានរួចហើយ”។

ចំពោះករណីនេះដែរ ប្រភពព័ត៌មានបានអោយដឹងថា គេបានឃើញ ជនសង្ស័យដែលជាជនបង្ក បានលាក់ខ្លួនពួកសម្ងំ ក្នុងផ្ទះមួយកន្លែង នៅក្នុងភូមិ ហើយពេលខ្លះយប់ឡើង ក៏មានការជួបជុំផឹកស៊ី ថែមទៀតផង។

ពាក់ព័ន្ធករណីខាងលើនេះ លោក អ៊ុច ប៊ុនអ៊ុយ នាយប៉ុស្តិ៍រដ្ឋបាល អូរស្មាច់ បានរៀបរាប់តាមទូរស័ព្ទថា ចំពោះជនសង្ស័យជាជនបង្ក ឈ្មោះ ពែង រដ្ឋា គឺសមត្ថកិច្ច បានដុតដៃដុតជើង ត្រៀមខ្លួនចាំចាប់ជនរូបនេះ ជានិច្ច ព្រោះមានដីកា នៅក្នុងដៃរួចហើយ ហើយរឿងករណីហិង្សានេះគឺជារឿងធំ មិនអាចលើកលែងអោយបានទេ គឺអោយតែឃើញ ត្រូវតែចាប់ខ្លួនតែម្តង។ ចំពោះការចោទប្រកាន់ថា អាជ្ញាធរមូលដ្ឋាន បានទទួលផលពី ស្រ្តីឈ្មោះ ពែង សាំងលីម ហៅ ហៀញ ត្រូវបានលោក អ៊ុច ប៊ុនអ៊ុយ នាយប៉ុស្តិ៍រដ្ឋបាល អូរស្មាច់ បដិសេដទាំងស្រុងចំពោះការចោទប្រកាន់នេះ ហើយលោកនឹងហៅ ស្រ្តីឈ្មោះ ពែង សាំងលីម ហៅ ហៀញ មកសួរនាំ លើការនិយាយ ចោទប្រកាន់មកលើ កំលាំងសមត្ថកិច្ចបែបនេះ។

លោក អ៊ុច ប៊ុនអ៊ុយ នាយប៉ុស្តិ៍រដ្ឋបាល អូរស្មាច់ បញ្ជាក់បន្ថែមថា គឺមិនមានវត្តមាន ឈ្មោះ ពែង រដ្ឋា នៅក្នុងមូលដ្ឋាននោះទេ ប្រហែលជា បងប្អូនប្រជាពលរដ្ឋ មើលច្រលំ ក៏អាចថាបាន។

គួររំលឹកផងដែរថា ប្រភពព័ត៌មាន ដែលទទួលបាន គឺក្មេងស្រីដែលទទួលរងនូវអំពើហិង្សា និងទារុណកម្មនោះ គឺត្រូវមនុស្ស២នាក់វាយ ធ្វើបាប ដោយម្នាក់ ឈ្មោះ ពែង សាំងលីម ហៅហៀញ ភេទស្រី អាយុ៤២ឆ្នាំ ជាវាយលើក្មេងស្រីទាំង២នាក់មុន ហើយបន្ទាប់ ឈ្មោះ ពែង រដ្ឋា ហៅ រ័ត្ន អាយុ២៣ឆ្នាំ ដែលត្រូវជាកូនរបស់ឈ្មោះ ពែង សាំងលីន បានបន្តវាយទៅលើក្មេងស្រី ទាំង២នាក់ រហូតដល់បែកឈាម និងមានស្នាម ពេញខ្នង។ ក្រោយមកទៀត នៅលើគណនី ហ្វេសបុក ឈ្មោះ Pui Osmach ដែលគេដឹងថា ជាម្ចាស់សត្វសារិកាកែវ និងត្រូវជាប្អូន របស់ឈ្មោះ ពែង សាំងលីន និងត្រូវជាពូ របស់ឈ្មោះ ពែង រដ្ឋា បែរជាសរសេររៀបរាប់ថា “ដោយសារទុកចិត្តទៅលើក្មេងៗ នៅជាមួយយើងពេក ខំឲ្យលុយវាទៅទិញចំណីរាល់ថ្ងៃ ពេលសួរវា បានដាក់ចំណីឲ្យ សារិកាកែវអត់វាថាដាក់ឲ្យរាល់ថ្ងៃ ហើយពេលនេះបានទៅមើលផ្ទាល់ បែរជាសារិកាកែវជាវាងាប់ទាំងពីរ តើគួរដាក់ទោសបែបណា ណ?”។ សូមបញ្ជាក់ថា ជនរូបនេះ មិនបានចូលរួមវាយទៅលើក្មេងស្រីទាំង២នាក់នោះទេ។

សូមបញ្ជាក់ផងដែរថា ពាក់ព័ន្ធករណីហិង្សាខាងលើនេះ រសៀលថ្ងៃទី១៤ ខែកុម្ភៈ ឆ្នាំ២០២១ នេះ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានបញ្ជាកម្លាំង អធិការនគរបាល ក្រុងសំរោង សហការជាមួយកម្លាំងប៉ុស្តិ៍រដ្ឋបាល អូរស្មាច់ ធ្វើការស្រាវជ្រាវ ករណីហិង្សាដោយចេតនា លើអ និតិជន ដែលបានកើតឡើងនៅថ្ងៃទី១១ ខែកុម្ភៈ ឆ្នាំ២០២០ ម៉ោង១៨នឹង០០នាទី នៅចំណុច ផ្លូវលេខ៤ ភូមិគិរីមង្គល សង្កាត់អូរស្មាច់ ក្រុងសំរោង ខេត្តឧត្ដរមានជ័យ។ ហើយកម្លាំងនគរបាល ខេត្តឧត្តរមានជ័យ កំពុងស្រាវជ្រាវ ស្វែងរក ជនសង្ស័យ និងកសាងកំពុងសំណុំរឿងតាមច្បាប់ករណី ហិង្សា ដោយចេតនាលើអនិតិជន។

លោកស្នងការបានឲ្យដឹងថា ជនសង្ស័យ ឈ្មោះ ពែង រដ្ឋា ហៅ រ័ត្ន ភេទប្រុស អាយុ២៣ឆ្នាំ មានទីលំនៅភូមិកើតហេតុ។

គួររំលឹកថា ជនសង្ស័យ បានធ្វើសកម្មភាព យករំពាត់ មែកឈើ វាយទៅលើជនរងគ្រោះ ឈ្មោះ ផាត លីហ្សាប ភេទស្រី អាយុ១២ឆ្នាំ មានទីលំនៅភូមិកើតហេតុ និង ឈ្មោះ ផាត ស្រីង៉ិក ភេទ ស្រី អាយុ១០ឆ្នាំ មានទីលំនៅភូមិកើតហេតុ (ទាំង២នាក់ ជាក្មេងកំព្រាដោយ ឪពុក.ម្តាយ ជាប់ពន្ធនាគារ) បណ្ដាលឲ្យមានស្នាមរបួស នៅលើខ្នងជាច្រើនកន្លែង។ ក្រោយពីទទួលរងនូវអំពើហិង្សា អាជ្ញាធរ មូលដ្ឋាន រួមជាមួយស្ថាប័នពាក់ព័ន្ធ បានចុះទៅដល់ទិតាំងកើតហេតុ និងបាននាំរំដោះក្មេងស្រីទាំង២នាក់ រួមជាមួយប្អូនម្នាក់ទៀត យកទៅកាន់ មណ្ឌលកុមារកំព្រា មួយនៅខេត្តបាត់ដំបង។

លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បានបញ្ជាក់ថា មូលហេតុខឹងក្មេងស្រីទាំង២នាក់ ធ្វើឲ្យសត្វ សារិកាកែវ ងាប់ចំនួន២ក្បាល ព្រោះក្មេងស្រីទាំង២នាក់ ភ្លេចដាក់ ទឹកនិងចំណី ឲ្យសត្វសារិកាកែវ ផឹក ស៊ី។ បច្ចុប្បន្ន កម្លាំងជំនាញកំពុងធ្វើការស្រាវជ្រាវស្វែងរកជនសង្ស័យ និងកសាងកំពុងសំណុំរឿងតាមនិតិវិធី ច្បាប់។

ប្រភពព័ត៌មាន បានបង្ហើបទៀតថា គណនី ហ្វេសបុក ឈ្មោះ Pui Osmach និងមានឈ្មោះពិតប្រាកដ គឺ (ពែង ពុយ) ជាមន្រ្តីធ្វើការនៅច្រកព្រំដែនអូស្មាច់ ខាងព្រំប្រទល់ថៃ ហើយបុគ្គលរូបនេះ នារយៈពេលកន្លងមក ក៏ធ្លាប់មានឈ្មោះមិនល្អផងដែរ ខាងគៀបសង្កត់ ពលករខ្មែរ៕