ភ្នំពេញ៖ ប្រជាពលរដ្ឋជាង១០នាក់ មកពីស្រុកឈូក ខេត្តកំពត និង អ្នកខ្លះមកពីខេត្តកោះកុង កាលពីថ្ងៃទី១៤ ខែវិច្ឆិកា ឆ្នាំ២០២០ បាននាំគ្នាទៅក្រុមហ៊ុន «ពិភពដីមាស អ៊ិនវេសម៉ិន .» មានទីតាំងស្ថិតនៅភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ដែលលោកហ៊ី គឹមហុង ជាអគ្គនាយក ដើម្បីសុំដកការប្រាក់និងប្រាក់ដើមវិញ សរុបជាង១០ម៉ឺនដុល្លារ ក្រោយពួកគាត់មើលឃើញពីរោគសញ្ញានៃការឆបោក ដោយសង្ស័យថា ក្រុមហ៊ុននេះ គឺជាក្រុមហ៊ុនបោកប្រាស់

បើតាមការអះអាងពីប្តីប្រពន្ធចំណាស់២នាក់ ដែលជាជនរងគ្រោះមកពីខេត្តកោះកុង បានឲ្យដឹងថា ពួកគាត់ធ្វើដំណើរមកក្រុមហ៊ុន «ពិភពដីមាស អ៊ិនវេសម៉ិន .» នាពេលនេះ គឺ ដើម្បីសុំដកការប្រាក់និងប្រាក់ដើមវិញ ដែលសម្រាប់រូបគាត់២នាក់ មានចំនួនជាង២ម៉ឺនដុល្លារ ចំណែកអ្នកដទៃទៀត គឺ អ្នកខ្លះ១ម៉ឺនដុល្លារ និង ២ម៉ឺនដុល្លារ ហើយនៅមានមនុស្សរាប់រយនាក់ទៀត ដែលបានដាក់លុយវិនិយោគជាមួយក្រុមហ៊ុន

សញ្ញាណនៃការឆបោកនេះ ត្រូវបានពួកគាត់ទាំង២នាក់នេះ បន្តថា «ក្រុមហ៊ុន ពិភពដីមាស អ៊ិនវេសម៉ិន .» នេះ បានចេញសញ្ញាណនៃការឆបោក ទើបពួកគាត់រូសរាន់ប្រញាប់មកដកប្រាក់ វិញ ព្រោះខ្លាចបាត់បង់ប្រាក់ទាំងនេះ បន្ថែមពីនេះពួកគាត់ រៀបរាប់ ថា គាត់មានលុយ២ម៉ឺនដុល្លារ ដែលខំខ្ចីពីធនាគារ គាត់បានទិញដី «ក្រុមហ៊ុន ពិភពដីមាស អ៊ិនវេសម៉ិន .» ចំនួន២ឡូតិ៍ តម្លៃ១ម៉ឺនដុល្លារ និង ១ម៉ឺនដុល្លារទៀត ដាក់ចូលវិនិយោគជាមួយក្រុមហ៊ុន

សូមជម្រាបថា ដីឡូតិ៍២ឡូតិ៍ តម្លៃ១ម៉ឺនដុល្លារ នេះ គឺ ក្រុមហ៊ុន អោយការប្រាក់៣%ក្នុងមួយខែ មានន័យថា ពួកគាត់ បានទទួលប្រាក់៣០០ដុល្លាររយៈពេល១៨ខែ ហើយគ្រប់រយៈពេល២៤ខែ ក្រុមហ៊ុននឹងទិញដីនេះវិញ ដោយអោយប្រាក់ចំណេញ៣០% មានន័យថារយៈពេល២៤ខែ លុយ១ម៉ឺនដុល្លារ នឹងក្លាយជាលុយ១៣,០០០ដុល្លារអាមេរិក

សម្រាប់លុយ១ម៉ឺនដុល្លារទៀត ដែលដាក់វិនិយោគជាមួយក្រុមហ៊ុន គឺ បើគាត់ដាក់កុងត្រា៦ខែ គាត់នឹងទទួលបានការប្រាក់១០%ក្នុងមួយខែមានន័យថា បានលុយ១ពាន់ដុល្លារ រៀងរាល់ខែ ប៉ុន្តែ លុយនេះ ៦ខែទើបបើកបាន ទាំងការទាំងដើម គឺ ចំនួន១៦,០០០ដុល្លារអាមេរិក ប៉ុន្តែផ្ទុយទៅវិញ បើគាត់មិនចង់ដាក់កុងត្រា៦ខែ ទេ គាត់នឹងទទួលបានការប្រាក់៧% ស្មើនឹង៧០០ដុល្លារអាមេរិក ជារៀងរាល់ខែ សម្រាប់រយៈពេល៦ខែ

ជុំវិញបញ្ហានេះ ក្រុមប្រជាពលរដ្ឋជាច្រើននាក់ ថ្លែងប្រាប់ថា ប៉ុន្តែរយៈពេលជាច្រើនខែមកហើយ ដែលពួកគាត់ពុំបានទទួលលុយការប្រាក់នោះទេ តែបើទទួល គឺ តិចតួចបំផុត ដោយបាន៥០ដុល្លារប៉ុណ្ណោះ សម្រាប់រយៈពេល៩ខែមកនេះ។ ដោយសារកត្តាមិនគោរពសន្យាទាំងនេះហើយ ទើបបានជាប្រជាពលរដ្ឋ ត្រូវតែមកសុំដកការប្រាក់និងប្រាក់ដើមពីក្រុមហ៊ុន វិញ ព្រោះខ្លាចក្រុមហ៊ុនមួយនេះ បោកប្រាស់ពួកគាត់

ដោយឡែកបើយើងក្រឡេកទៅមើលអំពីដំណោះស្រាយដែលពួកគាត់បានជជែកគ្នា រយៈពេលជាច្រើនម៉ោងទៅហើយ គឺពុំទទួលបានលទ្ធផលល្អ ដោយក្រុមហ៊ុនបានលើកហេតុផលជាច្រើន ក្នុងការមិនអាចដកលុយដើមវិញអោយប្រជាពលរដ្ឋ

ណាមួយបើសិនក្រុមហ៊ុន ប្រគល់លុយដើមឲ្យប្រជាពលរដ្ឋនោះ នឹងមានប្រជាពលរដ្ឋជាច្រើននាក់ទៀត សម្រុកមកសុំដកលុយដូចគ្នា ដែលអាចធ្វើអោយក្រុមហ៊ុន ដួលរលំ

ជុំវិញបញ្ហានេះដែរ នៅរសៀលថ្ងៃចន្ទទី១៦ ខែវិច្ឆកា ឆ្នាំ២០២០នេះ អង្គភាយើងបានព្យាយាមទូរស័ព្ទទៅលេខក្រុមហ៊ុនខាងលើ ដើម្បីសុំការបញ្ជាក់ពីក្រុមហ៊ុនចូល តែគ្មានអ្នកទទួល៕

LEAVE A REPLY

Please enter your comment!
Please enter your name here