ភ្នំពេញ ៖ ក្រុមហ៊ុន ធី អ អ៊ី អ៊ឹមផត អិចផតឯ.ក (T R E IMPORT EXPORT CO., LTD.) និង គណៈកម្មាធិការប្រយុទ្ធប្រឆាំងផលិតផលក្លែងក្លាយ បានរៀបចំពិធីចុះហត្ថលេខា លើកិច្ចព្រមព្រៀង សហការគ្នា ទប់ស្កាត់ផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ ដល់សុខភាពនិងសុវត្ថិភាព កាលពីព្រឹកថ្ងៃទី១៧ ខែមេសា ឆ្នាំ២០២០ នៅទីស្តីការក្រសួងមហាផ្ទៃ។

ពិធីចុះហត្ថលេខាលើលើកិច្ចព្រមព្រៀង សហការ រវាងគណៈកម្មាធិការប្រយុទ្ធប្រឆាំផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ ដល់សុខភាពនិងសុវត្ថិភាព ជាមួយក្រុមហ៊ុន ធី អ អ៊ី អ៊ឹមផត អិចផតឯ.ក ក្រោមអធិបតីភាព ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ ឯកឧត្តម ឧត្តមសេនីយ៍ លីវ សុផាណារិទ្ធិ ប្រធានលេខាធិការដ្ឋាន នៃ គ.ប.ផ.ក ជាតំណាង របស់ គ.ប.ផ.ក និងភាគី ក្រុមហ៊ុន តែ ស៊ូអេង អគ្គនាយិកាក្រុមហ៊ុន ធី អ អ៊ី អ៊ឹមផត អិចផត ឯ.ក (TRE)។

ឯកឧត្តម នាយឧត្តមសេនីយ៍ មៀច សុផាន់ណា បានលើកឡើងពីការរាលដាល ជំងឺកូវីដ១៩ ដោយខណៈពេលដែលសកលលោក ក៏ដូចជាប្រទេសកម្ពុជា កំពុងជួប មានករណីជំងឺកូវីដ១៩ ដែលស្ថិតក្នុងស្ថានភាពដ៏ពិបាកនេះ ក៏មានជនខិលខូចមួយចំនួនបានលួចនាំចូល និងចកចាយនូវឧបករណ៍បរិក្ខាពេទ្យ អាល់កុល ជែល និងសារធាតុសម្លាប់មេរោគ ដែលគ្មានប្រភពច្បាស់លាស់ គ្មានគុណភាពគ្រប់គ្រាន់ ដោយពុំទានទទួលបានលិខិតអនុញ្ញាតពី ក្រសួងស្ថាប័នមានសមត្ថកិច្ចនៅឡើយទេ ហើយសកម្មភាពនេះ គឺជាអំពើខុសច្បាប់ ដែលអាចប៉ះពាល់យ៉ាងធ្ងន់ធ្ងរ ដល់សុខភាពប្រជាពលរដ្ឋយើង។

ឯកឧត្តម នាយឧត្តមសេនីយ៍ មៀច សុផាន់ណា បន្តថា ដើម្បីបង្ហាញអោយឃើញថាក្រុមហ៊ុនដែលមានច្បាប់ទំលាប់ត្រឹមត្រូវ គឺយើងត្រូវតែទទួលស្គាល់ និងលើកទឹកចិត្តអោយបន្តសកម្មភាពធុរកិច្ចរបស់ខ្លួន អោយបានកាន់តែរីកចម្រើនថែមទៀត ចំណែឯបងប្អូនមិនទាន់មានច្បាប់ទម្លាប់ត្រឹមត្រូវ ត្រូវប្រញាប់ស្រូតរូតទៅបំពេញបែបបទ ចុះបញ្ជីស្នាមអោយបានត្រឹមត្រូវ ដើម្បីអោយប្រជាពលរដ្ឋយើង ដែលជាអ្នកប្រើប្រាស់បានទទួលនូវផលិតផល និងសេវាកម្ម ដែលមានគុណភាពល្អ ហើយស្របច្បាប់។

លោកស្រី តែ ស៊ូអេង អគ្គនាយិកាក្រុមហ៊ុន ធី អ អ៊ី បានអោយដឹងថា ក្រុមហ៊ុន ធី អ អ៊ី គឺជាក្រុមហ៊ុនស្របច្បាប់ដែលបាននាំចូលផ្តាច់មុខ និងចែកចាយផលិតផលគ្រឿងសម្អាង ចំណីអាហារ និងផលិតជំនួយសុខភាព ពីបណ្តាប្រទេសនៅប៉ែកអាស៊ី និងអឺរ៉ុប មានដូចជាប្រទេសអ៊ីតាលី ថៃ កូរ៉េ បារាំង ជាដើម។ ដោយមើលឃើញពីស្ថានភាពការរីករាលដាល នៃផលិតផលក្លែងក្លាយ និងខុសច្បាប់ ដែលប៉ះពាល់ និងសុវត្ថិភាព ទើប គ.ប.ផ.ក រៀបចំឲ្យមានកិច្ចព្រមព្រៀងសហការ រវាង គ.ប.ផ.ក និងក្រុមហ៊ុនគឺដើម្បីធ្វើកិច្ច សហការរួមគ្នា ក្នុងការប្រយុទ្ធប្រឆាំងការនាំចូល ការផលិត និងចែកចាយ នូវផលិតផល ដែលក្លែងក្លាយនិងខុសច្បាប់ នៅក្នុងព្រះរាជាណាចក្រកម្ពុជា និងដើម្បីជួយការពារផលប្រយោជន៍ស្របច្បាបើរបស់ក្រុមហ៊ុន ការប្រកបអាជីវកម្ម និងរួមចំណែកយ៉ាងសំខាន់ក្នុងបុព្វហេតុ និងបេសកកម្មថែរក្សាលើកកម្ពស់សុខភាព សាធារណៈជូនប្រជាពលរដ្ឋ។

លោកស្រី តែ ស៊ូអេង អគ្គនាយិកាក្រុមហ៊ុន ធី អ អ៊ី បន្តថា បន្ថែមលើសពីនេះទៅទៀត កន្លងមក ក្រុមហ៊ុន ធី អ អ៊ី ក៏បានចូលរួមចំណែកក្នុងធ្វើការងារមនុស្សធម៌ និងសង្គមកិច្ចជាច្រើនផងដែរ ដោយសារទស្សនៈវិស័យរបស់ក្រុមហ៊ុនទៅថ្ងៃខាងមុខមិនត្រឹមតែពង្រឹងតែលើគុណភាព និងសុវត្ថិភាពរបស់ផលិតផលតែត្រឹមប៉ុនណេះទេ តែក្រុមហ៊ុនក៏បានគ្រោង និងត្រៀមចូលរួមចំណែកឲ្យបានកាន់តែច្រើននៅក្នុងការជួយដល់សង្គមជាតិដូចជា លើកស្ទួយស្រ្តីក្នុងការបង្កើនប្រាក់ចំណូលឲ្យបានកាន់តែច្រើនដូចបុរស រូមចំណែកលើកស្ទួយវិស័យអប់រំ ថែរក្សាការពារបរិស្ថាន យុទ្ធនាការប្រឆាំងគ្រឿងញៀន និងសម្មភាពផ្សេងៗជាច្រើនទៀតដែលយើងអាចធ្វើទៅបានដើម្បីសង្គមជាតិយើង។

គូសបញ្ជាក់ផងដែរថា គណៈកម្មាធិការ បានប្រតិបត្តិការបង្ក្រាប និងបំផ្លាញចោលផលិតផលខុសច្បាប់ជាច្រើន និងមានចំនួន រាប់រយតោន រួមមាន ៖ ផលិតផលឱសថគ្រឿងសម្អាង ផលិតផលប្រើប្រាស់ និងគ្រឿងឧបភោគបរិភោគ ខុសច្បាប់ និងខូចគុណភាពជាច្រើនសន្ធឹកសន្ធាប់ ព្រមទាំងបានឃាត់ខ្លួនជនសង្ស័យបញ្ជូនទៅតុលាការ ដើម្បីផ្តន្ទាទោសតាមច្បាប់ជាច្រើននាក់ផងដែរ៕

LEAVE A REPLY

Please enter your comment!
Please enter your name here